اسلام آباد 25 دسمبر (اے پي پي) خارجه وزير مخدوم شاه محمود قريشي د كرسمس په اړه مسيحي ټولنې ته مباركي وركولو سره وئيلي دي چې په خوږ وطن كښې مېشته اقليتونه هغه ټول حقوق لري كوم چې اسلام دوي ته وركړي دي، پاكستان د نړۍ هغه يواځنې هېواد دے د كوم په قومي بېرغ كښې چې اقليتونو ته نمائندګي وركړې شوې. خارجه وزير ووئيل چې د اسلامي تعليماتو له مخې ټول مخلوقات برابر دي او اقليتونو ته مساوي حقوق وركول زمونږ د ايمان برخه ده. په پاكستان كښې اقليتونه برابر حقوق لري. د پاكستان آئين هم اقليتونو ته يو ډول حقوق وركړي دي. د دې په ضد په ګاونډي هېواد هند كښې كوم چې ځان ته سېكولر او د بشري حقونو بېرغ هسكوونكې هېواد وائي، اقليتونو سره امتيازي سلوك كولې شي او په دې وخت كښې چې په كشمير او هند كښې اقليتونو سره كوم سلوك كېږي، هغه د نړۍ په وړاندے دے. ده ووئيل چې پاكستان د اقليتونو په مېنځ كښې كوم فرق نه كوي او دوي ته د هغوي د مذهب له مخې د ژوند تېرولو پوره موقع وركوي. دغسې په پاكستان كښې اقليتي ټولنه هم د هېواد په پرمختګ او خوشحالې كښې خپل بشپړ كردار ترسره كوي. ده ووئيل چې د مذهبونو ترمېنځه همغږي د وخت مهم ضرورت دے. ده ووئيل چې مونږ ټولو ته په ګډه د خوږ وطن پرمختګ او خوشحالې لپاره كار كول دي او دا عظيم اسلامي، معاشي او فلاحي رياست جوړول دي د كوم خوب چې د پاكستان باني قائداعظم محمد علي جناح ﴿رح﴾ ليدلے و.
