اسلام آباد۔22اگست (اے پی پی) سپیکر قومی اسمبلی سردار ایاز صادق غزہ اچ جاری اسرائیلی جارحیت دی مذمت کریندیں 7 اکتوبر 2023ء توں گھن تے ہݨ تئیں 60 ہزار توں زیادہ نشوم فلسطینیاں دی شہادت تے ݙکھ تے افسوس کیتے۔ آپݨے ہک مذمتی بیان اچ انہاں آکھیے جو اسرائیلی جارحیت پاروں شہید تھیوݨ آلیں اچ وݙی تعداد ٻالاں، تریمتاں اتے بڈھے لوکاں دی اے ، اسرائیلی قابض افواج فلسطین اچ سکولاں، ہسپتالاں، عبادت گاہواں اتے پناہ گزین کیمپاں تے حملے کیتے جیڑھا ٻہوں غیر انسانی اتے غیر اخلاقی عمل اے۔ انہاں آکھیا جو اسرائیلی قابض افواج ولوں فلسطین اچ دوا، خوراک اتے امدادی سامان روکݨ ٻہوں شرمناک اتے غیر انسانی عمل اے، اسرائیل ولوں خوراک اتے دوا روکݨ پاروں ہزاراں فلسطینی ٻال اتے ٻُڈھے بُکھ اتے دوا نہ ملݨ پاروں شہید تھیندے پئن، فلسطینی عوام تے اسرائیلی ظلم انسانی حقوق اتے عالمی قوانین دی خلاف ورزی ہن، غزہ اچ جارحیت نال ہزاراں ٻال یتیم اتے بے سہارا تھی چُکئن، عالمی برادری دی خاموشی اسرائیل کوں مزید ظلم کرݨ دی کھلی چھُٹ ݙیندی پئی اے۔ انہاں مطالبہ کیتا جو اقوام متحدہ فلسطین اچ وختی جنگ بندی کیتے عملی اقدامات کرے، سلامتی کونسل دیاں قرارداداں موجب فلسطین دا منصفانہ اتے مستقل حل کڈھیا ونڄے، پاکستان فلسطینی عوام دے حق خود ارادیت دی بھرپور حمایت کریندے، القدس الشریف کوں دارالحکومت بݨا تے آزاد فلسطینی ریاست دا قیام پاکستان دا واضح موقف اے، پاکستان دی پارلیمنٹ اتے عوام ہر فورم تے فلسطین دے مسئلے کوں اُجاگر کریندے رہسن، فلسطینی عوام دے نال پاکستان دی پارلیمنٹ اتے عوام رلے کھڑن۔ سپیکر سردار ایاز صادق اسرائیلی جارحیت نال تھیوݨ آلیاں شہادتاں دے لواحقین کیتے صبر جمیل اتے زخمیاں دی چنڳی صحت یابی دی دعا وی کیتی۔
.jpg)
