اسلام آباد – 12 – سيپٽمبر (اي پي پي) صدر ڊاڪٽر عارف علوي ليبيا ۾ ڊيم ٽٽُي پوڻ ۽ ٻوڏ سان وڏي پئماني تي تباهي تي افسوس جو اظهار ڪندي چيو آهي ته مشڪل جي هن گهڙيءَ ۾ پاڪستان ۽ ان جي عوام جون همدرديون ليبيا جي عوام سان گڏ آهن. ايوان صدر جي پريس ونگ موجب صدر ليبيا جي شهر ڊرنا ۾ ٻوڏ سان قيمتي جاني ۽ مالي نقصان تي گهري ڏک ۽ افسوس ۽ قدرتي آفت ۾ ليبيا ۽ ان جي عوام سان يڪجهتي جو اظهار ڪيو. صدر چيو ته عالمي برادري مشڪل جي هن گهڙيءَ ۾ انساني همدرديءَ جي بنياد تي ليبا جي عوام کي ريليف پهچائي. هن فوت ٿيندڙن جي گهرڀاتين سان تعزيت ڪئي ۽ فوت ٿيندڙن جي مغفرت ۽ وارثن جي لاءِ صبر جميل جي دعا ڪئي.
