ملتان۔18 اکتوبر(اے پی پی) خارجه وزير شاه محمود قرېشي وئيلي دي چې پي ډي اېم غېر وقتي ٬ غېر فطري او غېر نظرياتي اتحاد دے۔ حكومت پي ډي اېم ته د جلسې كولو ښكاره اجازه وركړې۔ نه ئې كوم بندېز لګولې او نه ئې څوك نيولي دي۔ دا بېله خبره ده چې د ګوجرانوالې اولس پي ډي اېم مسترد كړو۔ مولانا فضل الرحمن د اولس په ځائې كرسيانو ته خطاب وكړو۔ ددې خيالاتو څرګندونه ده د اتوار په ورځ رضا هال كښې خبري كنفرنس ته خپل خطاب كښې وكړه۔ خارجه وزير ووئيل د اپوزيشن د 11 كسيزه ډلې د ګوجرانوالې غونډه كښې د پاك پوځ په ضد خپله كړې شوې ايجنډا د كوم پاكستاني كېدې نه شي۔ بلاول د كشمير مسئلې په اړه حقائقو نه خبر نه دے۔ د پاكستان دريځ ښكاره دے۔ بلاول د مودي دريځ ته پراختيا وركوي۔ سعودي عربستان سره پخوانۍ اړيكې لرؤ۔ هغه ووئيل هېواد كښی بايد ګراني ختمه شي۔ دې لپاره حكومت ګامونه پورته كوي۔ د چينو او اوړو په ستونزه به ډېر زر قابو ومومؤ۔ د سوئيلي پنجاب مسئله اوس كوم هم حكومت شاته كولې نه شي۔ سېكرټرېټ لپاره به سپورټس كمپلېكس ملتان كښی جوړ كړے شي۔ او راروان بجټ كښې به د سوئيلي پنجاب بېله كتابچه رامخې ته كړې شي۔ د وفاقي كابينې په راروانه غونډه كښې د غنمو د مرستې قيمت اعلان امكان لري۔ كروندګرو سره به د مذاكراتو د لارې د مسئلې حل ولټولې شي۔ شاه محمود قرشي ووئيل د بلاول تقرير ما اورېدلے دے هغه وائي غشې د كمان نه وتلے دے ولې حقيقت دا دے چې دا غشې سندھ كښې د خلكو په سينه كښې پېوست شوے دے۔ هغه ووئيل پخوا دې ګوند د ذوالفقار علي بھټو او بې نظير بھټو په نامه څو وارې ووټ اخستے دے دوئي نور څو ځله اولس بې وقوفه جوړوي۔ خلك اوس شعور لري هغوي خپله پرېكړه پخپله كوي۔ هغه ووئيل كوم وخت چې نواز شريف تقرير كولو نو د نون ليګ كارمندانو لاسونه پړقول ولې د پيپلز ګود كارمندان چپ وو۔ د بلاول د تقرير په مهال د نون ليګ كارمندان سټېډيم نه روان شول او كله چې د فضل الرحمن خطاب وو نو سټېډيم خالي وو۔ مونږ دې خلكو ته بشپړه آزادي وركړې وه۔ هغه ووئيل چې اپوزيشن د نظام په ضد سازش كوي۔ كه يو ټاكلے حكومت په دې طريقه رخصت كړے شو او دا رواج جوړ شو نو دا نظام به څنګه مخ په وړاندے ځي۔ سياسي استحكام به څنګه پېدا كېږي۔ يو حكومت كه رخصت كړے شي نو د بل په ضد به سازش پېل شي۔ هغه ووئيل اپوزيشن د معيشت په ضد سازش كوي ۔ د معيشت بحالۍ په لاره كښې ركاوټونه پېدا كولې شي۔ هغه ووئيل زه باور لرم چې سوداګره ورورولي به د دې سازش برخه جوړه نه شي۔ هغه ووئيل بلاول بھټو زما حوالې سره ووئيل چې د پاكستان او سعودي عربستان ترمينځھ اوس اړيكې هغسې نه دي۔ بلاول بھټو په دې لړ كښې غلط فهمۍ سره مخ دے۔ سعودي عربستان سره زمونږ اړيكې مستحكم دي۔ زما تعلق اولياﺀ ښار سره دے او د ملتان اولس چې د مكې او مدينې سره كومه مينه لري هغه ختمېدې نه شي۔ هغه ووئيل په سي پېك مو رائې يوه ده۔ بلاول بايد ابهام پېدا نه كړي۔ هغه ووئيل د پي ډي اېم په اولسي غونډو كښې د قومي ادارو او پاك پوځ په نښه كول د كوم پاكستاني ايجنډا نه ده۔ اولس ته معلومه ده چې د پاكستان پوځ ترهګرو ته ماتې وركړې ده۔ سندھ كښې كه د كورونا ستونزې وي يا د نا امنۍ حكومت سره پاك پوځ مرسته كړې ده۔ هغه ووئيل ټكونه كول آسان كار دے د مثبت كارونو بايد ستائنه وكړې شي۔ هغه ووئيل په يوه غونډه كښې كومه كښې چې شهباز شریف ‘ بلاول ‘ احسن اقبال ‘ خواجه آصف او اسد الرحمن موجود وو مونږ دا وئيلې وو چې پاك پوځ او قومي ادارې سياست ته راكښل د پاكستان په ګټه نه دي۔ د دې باوجود د پي ډي اېم په غونډو كښې دا ډول خبرې كولې شي۔ هغه ووئيل پيپلز ګوند 5 كاله اقتدار كښې پاتے شو ولې تر ننه دوئي د بېنظير بھټو د وژونكو درك ونه لګولے شو۔ كوم خلك چې د خپل كور لپاره څه كولې نه شي هغوي د اولس تحفظ څنګه كولې شي۔ د يوې بلې پوښتنې په ځواب كښې ده ووئيل د احتساب عمل سست دے بايد دا تند كړے شي۔ هغه ووئيل د نواز شريف هېواد څخه بهر د درملنې ناټك د ټولو وړاندې دے۔ هغه روغ رمټ دے۔ دې بايد په اخلاقي توګه عدليه ته وړاندے شي۔ هغه ووئيل په دې كښې شك نشته چې تحريك انصاف هم په سړكونو احتجاج كړے ولے كله چې زمونږ په غوښتنه جوډيشل كمېشن جوړ شو نو مونږ سړكونه پرېښودل او د كېمشن پرېكړه مو قبول كړه۔ ټولو حكومتونو 5 كاله پوره كړي دي۔ زمونږ هڅه ده چې د ګرانۍ د چېلنج مقابله وكړؤ۔ ولې ګراني يوازې پاكستان كښې نه ده۔ هغه ووئيل كروندګرو سره د مذاكراتو د لارې د مسئلو حل لټولې كېدې شي۔ د مذاكراتو دروازې بايد بندې نه كړې شي
