اسلام آباد۔10ستمبر (اے پی پی) وفاقی وزیر موسمیاتی تبدیلی و ماحولیاتی ہم آہنگی ڈاکٹر مصدق ملک نال کینیڈین ہائی کمیشن دے ناظم الامور لوک مائرز ملاقات کیتی جیں اچ پاکستان اچ اڄوکی تباہ کن چھل دی صورتحال اتے ݙوہیں ملکاں وچال ݙوطرفہ تعاون دے امکانات تے ڳالھ مہاڑ تھئی ۔ لوک مائرز پاکستان دے لوکاں دے نال ہمدردی اتے یکجہتی دا اظہار کیتا اتے اڄوکی چھل توں تھیوݨ آلے جانی و مالی ضیان تے ݙکھ تے افسوس کیتا ۔ ڈاکٹر مصدق ملک لوک مائرز کوں ݙسایا جو اڄوکی چھل پاروں تقریباً 36 لکھ لوک بے گھر تھی ڳئن۔ انہاں ݙسایا جو ریلیف آپریشن جاری ہن اتے پیشرفت کریندے پئن لیکن اصل چیلنج ایں ویلھے سامݨے آسی جݙاں پاݨی لہݨ دے بعد تباہی دے آثار اتے ڈھانچہ جاتی نقصان ٻیا واضح تھیسے۔ ملاقات اچ ݙوہیں فریقین چھل دے نتیجے اچ پاکستان اچ غذائی تحفظ تے پووݨ آلے اثرات تے وی تفصیلی ڳالھ مہاڑکیتی۔ ایں ضمن اچ ضوابط، تجارتی موقع اتے جی ایم او بجاں دے استعمال دے ذریعے زرعی پیداوار اچ بہتری گھن آوݨ دے امکاناں تے غور کیتا ڳیا۔ ڈاکٹر مصدق ملک ٻیا ݙسایا جو وزارت موسمیاتی تبدیلی ماحولیاتی تحفظ ایجنسی دے عمل کوں ڈیجیٹائز کرݨ تے کم کریندی پئی اے تاں جو شفافیت کوں یقینی بݨایا ونڄے، ریگولیٹری امور اچ بہتری گھن آئی ونڄے اتے کارکردگی اچ ودھارا کیتا ونڄے۔ ݙوہیں فریقین ایں ڳالھ تے اتفاق کیتا جو موسمیاتی لچک، غذائی تحفظ اتے پائیدار ترقی دے شعبیں اچ سانجھے تعاون کوں ٻیا ودھارا ݙیوݨ کیتے موثر اقدامات کیتے ویسن اتے پاکستان و کینیڈا وچال ݙوطرفہ تعلقات کوں ٻیا مضبوط بݨاوݨ تے کم کیتا ویسی۔
