اسلام آباد ۔ 17 مئی (اے پی پی) آزاد كشمير كښې تېرو 24 ساعتونو كښې د كورونا نور درې كېسونو رامخې ته كېدو سره مجموعي شمېره 112 ته ورسېده۔ د اتوار په ورځ د آزاد كشمير د روغتيا څانګې لخوا د جاري شويو تفصيلاتو له مخې د 189 مريضانو د كورونا ټېسټونه وكړې شول كومو كښې چې د درې كسانو ټېسټونه مثبت راغلل۔ د دې درې واړو ځپليو تعلق مظفر آباد سره دے۔ تر دې دمه آزاد كشمير كښې د 3947 وګړو ټېسټونه شوي دي كومو كښې چې د 3885 راپورونه ترلاسه شوي دي۔ ترلاسه شويو راپورونو كښې د پازېټيو شمېره 112 ده۔ دوئي كښې 77 كسان صحتياب شوي او 34 دا مهال بېلو روغتونونو كښې درملنو ته بستر دي۔
