اسلام آباد – 11 – آڪٽوبر (اي پي پي) اطلاعات ۽ نشريات واري نگران وفاقي وزير مرتضيٰ سولنگي چيو آهي ته سي پيڪ سان پاڪستان ۽ چين جي وچ ۾ عوامي رابطن کي سگهه ملي آهي، اٽڪل 28 هزار پاڪستاني شاگرد چين ۾ تعليم حاصل ڪري رهيا آهن، پاڪستان ۾ چيني زبان سکندڙن جي انگ ۾ تيزي سان اضافو ٿي رهيو آهي. پاڪستان نيشنل ڪائونسل آف آرٽس ۾ آرٽ نمائش ۽ ثقافتي شو کي خطاب ڪندي اطلاعات واري نگران وفاقي وزير چيو ته سي پيڪ جي شروع ٿيڻ کانپوءِ پاڪستان ۽ چين جي وچ ۾ عوامي سطح تي رابطا نئين بلندين تي پهتا آهن، اٽڪل 28 هزار پاڪستاني شاگرد چين ۾ تعليم حاصل ڪري رهيا آهن، تعاون جو اهو رخ بيلٽ اينڊ روڊ انيشي ايٽو فريم ورڪ ۾ انتهائي اهميت رکندڙ آهي. هن چيو ته پاڪستان ۾ چيني زبان سکندڙن جي انگ ۾ تيزي سان اضافو ٿي رهيو آهي، ان حوالي سان پنجاب يونيورسٽي، نمل يونيورسٽي جهڙن اعليٰ تعليمي ادارن ۾ انسٽيٽيوٽ پڻ قائم ڪيا ويا آهن. ان کانسواءِ پاڪستاني شاگرد چيني زبان سکڻ ۽ پروفيشنل ڊگري/ ڊپلوما حاصل ڪرڻ جي لاءِ چيني حڪومت جي وظيفن تي چيني يونيورسٽين ۾ پڻ تعليم حاصل ڪري رهيا آهن. هن چيو ته پاڪستان ۽ چين جا فنڪار آرٽ جي نمائشن جي ذريعي پنهنجي فن پارن جي نمائش جي لاءِ اڪثر هڪ ٻئي جي ملڪن جو دورو ڪندا آهن. هن چيو ته پاڪستان ۽ چين 2022ع ۾ گڏيل پڌرنامي ۾ مضبوط ٻطرفن لاڳاپن جي لاءِ عوامي سطح تي رابطن، سياحت جي شعبي ۾ تعاون ۽ ثقافتي مٽاسٽا جي اهميت تي زور ڏنو، نومبر 2021ع ۾ ٿيندڙ سياحتي مٽاسٽا ۽ تعاون تي مفاهمت جي ياداشت تي عمل ڪندي ٻنهي ملڪن 2023ع ۾ پاڪ چين سياحتي مٽاسٽا جو سال ملهائڻ ۽ سياحت کي فروغ ڏيندڙ ٻنهي ملڪن جي ادارن جي وچ ۾ مضبوط رابطا قائم ڪرڻ تي اتفاق ڪيو. هن چيو ته مئي 2023ع ۾ پيلس ميوزيم ۾ پاڪ چين گڏيل نمائش ۾ پاڪستاني عجائب گهرن مان گنڌارا تهذيب جي 173 نمونن جي نمائش ڪئي وئي جنهن جو مقصد ٻنهي ملڪن جي وچ ۾ گڏيل ورثي ۽ ثقافتي مٽاسٽا کي فروغ ڏيڻ سان گڏوگڏ عام ماڻهن ۽ چيني اسڪالرز جي لاءِ پاڪستان جي ورثي بابت بصيرت فراهم ڪرڻ هو. هن چيو ته اها مٽاسٽا نئين نه آهي، حقيقت ۾ 138 قبل مسيح کان وٺي اسان جي جديد دور تائين شاهراهه ريشم انهن ڪميونٽيز جي وچ ۾ مٽاسٽا، اثررسوخ ۽ تعاون جي لاءِ هڪ ڊگهي ترين ۽ مستقل مرڪز جي نمائندگي ۾ ڪامياب رهي آهي. هن چيو ته شاهراهه ريشم سان نه رڳو جنسن جي مٽاسٽا ٿئي ٿي پر ان ثقافت کي پڻ فروغ ڏنو آهي. مثال طور ٻڌازم انهي شاهراهه جي ذريعي چين پهتو، واپاري ڪاروان سان گڏ ٻڌ راهب هندستان کان وچ ايشيا ۽ چين ويا. هن چيو ته شاهراهه ريشم سان گڏ ڪيترن ئي شهرن ۾ ٻڌمت جون يادگارون پڻ دريافت ٿيون. هن چيو ته قديم دور ۾ ٻڌمت چين ۽ پاڪستان ٻنهي ۾ پروان چڙهيو. مشهور چيني سياح ۽ اسڪالر زان زانگ ستين صديءَ ۾ گنڌارا تهذيب جي علائقي جو سفر ڪيو جيڪو هاڻي موجوده پاڪستان آهي. هن پنهنجي سفرنامي ۾ مشهور بالاحصار فورٽ واديءَ سوات جو پڻ ذڪر ڪيو جيڪا هڪ قلعو بند شاهي رهائشگاهه هئي. هن چيو ته ٽيڪسلا رستي پاڪستاني خطي ۾ اهم ڪردار ادا ڪيو آهي جتي گنڌارا آرٽ جي ظهور سان گڏ ثقافتي سرگرميون عروج تي هيون. گنڌارا خطو ۽ ننڍي کنڊ پاڪ ۽ هند ٻئي 486-522 قبل مسيح تائين اولهه سان رابطا قائم ڪرڻ ۾ ڪامياب ٿي ويا هئا.
