پېنډې 29 فروری (اے پي پي) د هوابازې وفاقي وزير غلام سرور خان وئيلي دي چې د كرونا وائرس د خطر مقابلې لپاره حكومت په پوره ډول مستعد او فعاله دے، د امريكې افغان امن تړون د پاكستان لويه سفارتي بريا ده. وفاقي وزير غلام سرور خان دا خبرې د خالي په ورځ خبريالانو سره په غېر رسمي خبرو كښې وكړې. وفاقي وزير ووئيل چې په دې وخت كښې يو شمېر هېوادونه كرونا وائرس سره مخ دي، مونږ ته په همت او جرات سره د دې مقابله كول دي. ده ووئيل چې د اسلام آباد پشمول د هېواد په ټولو هوائي اډو كرونا سكريننګ كاٶنټرې جوړې كړې شوې دي. ده ووئيل چې د كرونا وائرس نه دې خلق ونه يرېږي، د كرونا وائرس د خطر مقابلې لپاره حكومت په پوره ډول مستعد او فعاله دے. وفاقي وزير ووئيل چې د امريكې افغان امن تړون د پاكستان لويه سفارتي بريا ده او د دې كرېډټ وزيراعظم عمران خان ته ځي.
