اسلام آباد۔8 دسمبر(اے پی پی):دفتر خارجہ دی ترجمان ممتاز زہرہ بلوچ آکھیے جو پاکستان اتے انڈونیشیا او آئی سی متعلق امور اتے سانجھی دلچسپی دے عالمی اتے علاقائی مسئلیں تے ڳالھ مہاڑ جاری رکھیسن ، اسلامی تعاون تنظیم دے سیکرٹری جنرل 11 اتے 12 دسمبر کوں پاکستان اتے آزاد کشمیر دا دورہ کریسن ، بھارت کشمیریاں کوں انہاں دے ناقابل تنسیخ حق خودارادیت توں محروم کررکھیے ، بھارت دے غیر قانونی زیرتسلط جموں و کشمیر اچ کشمیری صحافی شدید دٻاؤ اچ کم کریندے پئن ، پاکستان بلائنڈ کرکٹ ٹیم کوں ویزے جاری نہ کرݨ دے بھارتی فیصلے دے نتیجے اچ پاکستانی کھلاڑی خصوصی اہمیت دے حامل بین الاقوامی کھیݙاں دے ایونٹ اچ شرکت نی کرسڳیے ۔ دفتر خارجہ دی ترجمان خمیس کوں پریس بریفنگ اچ آکھیے جو بھارت دے غیر قانونی قبضے وچ جموں و کشمیر اچ کشمیری صحافی شدید دباؤ اچ کم کریندے پئن، انہاں کوں تڑیاں ، حملیں تے گرفتاریاں دا سامݨا اے، مقبوضہ کشمیر اچ نافذ کیتے ڳئے میڈیا پالیسی دا مقصد معلومات دے آزادانہ بہائوکوں گھٹ کرݨ تے میڈیا کوں بھارت دی غلط معلومات دی مہم دا محض ھک پروپیگنڈہ بݨاوݨا اے، کشمیری میڈیا کوں مقبوضہ علاقے دی اصل صورتحال دی کوریج کرݨ تے کل جماعتی حریت کانفرنس دے رہنماواں دے بیانات چھاپݨ توں روک ݙتا ڳئے ۔ ترجمان آکھیے کجھ ہفتے پہلے کشمیری فوٹو جرنلسٹ ثنا ارشاد متو کوں پلٹزر پرائز حاصل کرݨ کیتے نیویارک ونڄݨ توں روک ݙتا ڳئے جݙاں جو آصف سلطان، منان گلزار ڈار، فہد شاہ اتے سجاد گل سودھے نامور صحافی مختلف جیلاں اچ غیر قانونی طور تے نظر بند ہن۔ ترجمان آکھیے بھارتی حکام دی طرفوں مزید ٻہوں سارے لوکاں کوں سݙ تے انہاں کوں ہراساں کیتا ڳئے اتے انہاں کوں تڑیاں ݙتیاں ڳن۔ انہاں آکھیے اے ظالمانہ اقدامات پوری دنیا توں کشمیر تے بھارت دے غیر قانونی قبضہ دا اصل چہرہ نی لکا سڳدے۔ ترجمان آکھیے اساں 10 دسمبر کوں انسانی حقوق دے عالمی ݙینھ دے طور تے منیندوں ، اساکوں بھارت دے غیر قانونی طور تے زیرتسلط جموں و کشمیر دے مظلوم لوکاں کوں یاد رکھݨا چاہیدے ۔ اتھاں انسانی حقوق دیاں خلاف ورزیاں جاری ہن اتے بھارت کشمیریاں کوں انہاں دے ناقابل تنسیخ حق خودارادیت توں محروم کررکھیے ۔ ترجمان بھارت دے شہر ایودھیا اچ ہندو انتہا پسنداں دے ہتھوں تاریخی بابری مسجد دے انہدام دی 30 ویں برسی دا ذکر کریندے ہوئیں آکھیے جو اے بھارت اچ ودھدی مذ??بی عدم برداشت دی ھک افسوسناک یاد دہانی اے جیں کوں عالمی برادری کوں نظر انداز نی کرݨا چاہیدا ۔ ترجمان نابینا لوکاں کیتے تریجھے ٹی20 ورلڈ کپ کرکٹ ٹورنامنٹ اچ شرکت کیتے بھارت دی طرفوں پاکستان بلائنڈ کرکٹ ٹیم کوں ویزے جاری نہ کیتے ونڄݨ تے افسوس دا اظہار کریندے ہوئیں آکھیے جو بھارتی فیصلے دے نتیجے اچ پاکستانی کھلاڑی خصوصی اہمیت دے حامل بین الاقوامی کھیݙاں دے ایونٹ اچ شرکت نی کرسڳیے ۔ ترجمان آکھیے بھارت کوں کھیݙاں دے مقابلیں کوں سیا??ی رنگ ݙیوݨ دا رواج ختم کرݨا چاہیدے ۔ ترجمان دفتر خارجہ وزیر خارجہ بلاول بھٹو زرداری دے انڈونیشیا دے جاری دورے دا ذکر کریندے ہوئیں آکھیے جو ݙوہیں ملکاں دے وزرائے خارجہ بالی اچ تھیوݨ آلی ملاقات اچ ݙو پاسے تعلقات دی صورت حال دا جائزہ ڳھدے تے ساریاں سطحاں تے ݙوطرفہ مذاکرات کوں مزید تکڑا کرݨ تے سانجھے فیدہ مند تعاون کوں اڳوں ودھاوݨ تے اتفاق کیتے ۔ ترجمان آکھیے ݙو وݙے اسلامی ملکاں دی حیثیت نال پاکستان اتے انڈونیشیا او آئی سی متعلق امور اتے سانجھی دلچسپی دے عالمی اتے علاقائی مسئلیں تے ڳالھ مہاڑ جاری رکھیسن ۔ انہاں آکھیے ݙوہیں وزرائے خارجہ وزیر خارجہ دی سطح تے مشترکہ وزارتی کمیشن (جے ایم سی) دے قیام کیتے ھک تاریخی مفاہمتی یاددسشت تے دستخط کیتن ، جے ایم سی سانجھے طور تے فیدہ مند تعاون دی نگرانی کریسی تے ݙو پاسے باقاعدہ رابطیں کوں ودھارا ݙیسی ۔ ترجمان آکھیے اسلامی تعاون تنظیم (او آئی سی) دے سیکرٹری جنرل حسین براہیم طحہ 11 اتے 12 دسمبر کوں پاکستان دا دورہ کریسن ،گزریل سال نومبر اچ او آئی سی دے سیکرٹری جنرل دا عہدہ سنبھالݨ دے بعد انہاں دا پاکستان دا اے پہلا باقاع??ہ دورہ ہوسی۔ ترجمان آکھیے اسلامی تعاون تنظیم دے سیکرٹری جنرل وزیراعظم نال ملاقات کریسن تے وزیر خارجہ نال وفد دی سطح تے ڳالھ مہاڑ کریسن ۔ حسین براہیم طحہ آزاد جموں و کشمیر دا دورہ وی کریسن ۔ ترجمان آکھیے دورے دے دوران او آئی سی دے ایجنڈے تے موجود جھیڑا جموں و کشمیر، اسلامو فوبیا تے افغانستان اچ انسانی صورتحال سودھے ٻئے امور تے بحث تھیسی ۔ انہاں دے دورے توں او آئی سی دے رکن ملکاں وچال اقتصادی، سماجی اتے تکنیکی تعاون تے ڳالھ مہاڑ دا موقع ملسی ۔ انہاں آکھیے پاکستان او آئی سی دے بانی رکن اتے وزرائے خارجہ کونسل دے موجودہ سربراہ دی حیثیت نال اسلامی یکجہتی، اتحاد اتے مکالمے کوں ودھارا ݙیندا رہ ویسی ۔
