اسلام آباد 27 اګست (اے پي پي) وزیراعظم عمران خان وئيلي دي چې په سخت وخت كښې به د كراچۍ اولس تنها نه پرېږدو٬ د سختو بارانونو په سبب په ټول هېواد او په خاص توګه د كراچۍ اولس د ستونزو نه حكومت ښه خبر دے، د كراچۍ اولس د مسئلو مستقل حل لپاره به ډېر زره منصوبه اعلانوٶ۔ د زيارت په ورځ خپل ټويټ كښې وزیراعظم ووئيل د بحالۍ او د مرستې د كارونو خپله نګراني كوم٬ د اېن ډي اېم اے چيئرمېن او ګورنر سره پرله پسې په تماس كښې يم، د سېلاب په اوبو كښې د محصور كسانو رېسكيو كولو لپاره د اېن ډي اېم اے چيئرمېن ته په سمدستي توګه هدايات جاري كړې شوي دي، ځپليو ته د خوراك٬ چت او طبي آسانيو وركولو هم امر شوے۔ وزیراعظم د اېن ډي اېم اے چيئرمېن ته امر وكړو چې د وګړو د بنيادي ضرورتونو بحالي دې په هنګامي بنيادونو باوري كړې شي۔ وزیراعظم ووئيل د كراچۍ اولس د مسئلو مستقل حل لپاره به ډېر زره منصوبه اعلانوٶ چې پكښې د نالو صفائي٬ د سېورېج سسټم لګولو او د اوبو وركولو نظام به ښه كولې شي۔
