اسلام آباد-08 فيبروري (اي پي پي)ملڪ ۾ خميس ڏينهن 8 فيبروري تي عام چونڊن لاءِ پولنگ جو عمل مقرر وقت تي شروع ٿيو جيڪو بنا وقفي جي شام 5 وڳي تائين جاري رهيو، سڄي ملڪ ۾ قائم مختلف پولنگ اسٽيشنن تي ووٽرن جون ڊگهيون قطارون موجود آهن، وڏي تعداد ۾ عورتون، بزرگ شهري ۽ نوجوان پنهنجي ووٽ جي حق کي استعمال ڪرڻ لاءِ پولنگ اسٽيشنن تي پهچي رهيا آهن، چونڊ عمل کي پرامن بڻائڻ لاءِ سيڪيورٽي جا فول پروف انتظام ڪيا ويا آهن، ڏيهي ۽ پرڏيهي مبصر مختلف پولنگ اسٽيشنن جو دورو ڪري چونڊ عمل جو مشاهدو ڪري رهيا آهن. صدر ڊاڪٽر عارف علوي، سڌ سماءَ واري نگران وفاقي وزير مرتضيٰ سولنگي، مسلم ليگ (ن) جي قائد نواز شريف، اڳوڻو وزيراعظم شهباز شريف، مسلم ليگ (ن) جي اڳواڻ مريم نواز، پاڪستان پيپلزپارٽي جو چيئرمين بلاول ڀٽو زرداري، اڳوڻي صدر آصف علي زرداري، استحڪام پاڪستان پارٽي جي اڳواڻ جهانگير ترين ۽ ٻين سياسي شخيصتن پنهنجي پنهنجي تڪن تي پولنگ اسٽيشنن تي وڃي پنهنجو ووٽ استعمال ڪيو. چيف اليڪشن ڪمشنر سڪندر سلطانه راجا مرڪزي اليڪشن مانيٽرنگ ڪنٽرول سينٽر ۾ پاڻ اليڪشن عمل جي نگراني ڪري رهيو آهي. صوبائي اليڪشن ڪمشنر مختلف پولنگ اسٽيشنن جو دورو ڪري چونڊ عمل جو پاڻ جائزو وٺي رهيا آهن. 12 ڪرور 79 لک 21 هزار 49 رجسٽرڊ ووٽرز 17 هزار 758 اميدوارن مان قومي ۽ صوبائي اسيمبلي جي 855 تڪن ۾ پنهنجي اميدوارن جي چونڊ ڪندا. قومي اسيمبلي جي هڪ ۽ صوبائي اسيمبلي جي ٽن تڪن سميت چئن چونڊ تڪن ۾ اميدوارن جي لاڏاڻي سبب پولنگ ملتوي ڪئي وئي. سڄي ملڪ ۾ 14 لک 90 هزار چونڊ عملو مقرر ڪيو ويو آهي. جڏهن ته 90 هزار 675 پولنگ اسٽيشنز ۽ 2 لک 66 هزار 398 پولنگ بوٿ قائم ڪيا ويا آهن، هر تڪ جو غير حتمي ۽ غير سرڪاري نتيجو رٽرننگ آفيسر جي آفيس مان جاري ڪيو ويندو، اليڪشن ڪميشن طرفان جاري تفصيلن موجب پولنگ صبح 8 وڳي شروع ٿي ۽ بنا ڪنهن وقفي جي شام 5 وڳي تائين جاري رهندو. اسلام آباد مان قومي اسيمبلي جي 3 سيٽون آهن جن تي 10 لک 83 هزار 29 ووٽرز پنهنجي نمائندن جي چونڊ لاءِ ووٽ ڪاسٽ ڪندا. پنجاب مان قومي اسيمبلي جي 114 ۽ صوبائي اسيمبلي جي 296 سيٽن تي پنهنجي نمائندن جي چونڊ لاءِ 7 ڪروڙ 32 لک 7 هزار 896 ووٽرز پنهنجي ووٽ جو حق استعمال ڪندا. سنڌ مان قومي اسيمبلي جي 61 ۽ سنڌ اسيمبلي جي 130 سيٽن تي پنهنجي نمائندن جي چونڊ لاءِ 2 ڪروڙ 69 لک 94 هزار 769 ووٽرز پنهنجو ووٽ ڪاسٽ ڪندا. خيبرپختونخوا مان قومي اسيمبلي جي 44 ۽ صوبائي اسيمبلي جي 113 سيٽن تي پنهنجي نمائندن جي چونڊ لاءِ 2 ڪروڙ 12 لک 63 هزار 408 ووٽرز پنهنجي ووٽ جو حق استعمال ڪندا. قومي اسيمبلي جي 265 سيٽن لاءِ 5 هزار 113 اميدوار ميدان ۾ آهن جن ۾ 312 عورتون به شامل آهن. چئني صوبائي اسيمبلين ۾ مقابلي ۾ اميدوارن جو انگ 12 هزار 645 آهي جن ۾ 570 عورتون شامل آهي، بلوچستان مان قومي اسيمبلي جي 16 ۽ صوبائي اسيمبلي جي 51 سيٽن تي پنهنجي نمائندن جي چونڊ لاءِ 53 لک 71 هزار 947 ووٽر پنهنجي ووٽ جو حق استعمال ڪندا، قومي اسيمبلي جي ايڪ اين اي 8 باجوڙ، پي ڪي 22 باجوڙ، پي ڪي 91 ڪوهاٽ، پنجاب اسيمبلي جي تڪ پي پي 266 رحيم يار خان ۾ اميدوارن جي لاڏاڻي سبب پولنگ ملتوي ڪئي وئي آهي. سڄي ملڪ ۾ 16 هزار 766 پولنگ اسٽيشنن کي انتهائي حساس، 29 هزار 985 کي حساس جڏهن ته 44 هزار 26 پولنگ اسٽيشنن کي نارمل قرار ڏنو ويو آهي. پنجاب ۾ 5 هزار 624 پولنگ اسٽيشنون حساس ترين قرار ڏنيون ويون آهن، هر پولنگ اسٽيشن تي 5 اهلڪار مقرر ڪيا ويا آهن، سنڌ ۾ 430 پولنگ اسٽيشنن کي انتهائي حساس قرار ڏنو ويو آهي جتي هر هڪ پولنگ اسٽيشن تي 8 اهلڪار مقرر ڪيا ويا آهن، اهڙي طرح خيبرپختونخو ا ۾ 4265 حساس پولنگ اسٽيشنن مان هر هڪ پولنگ اسٽيشن تي 9 اهلڪار مقرر ڪيا ويا آهن.بلوچستان ۾ 1047 پولنگ اسٽيشنن کي انتهائي حساس قرار ڏنو ويو آهي، جن مان هر هڪ پولنگ اسٽيشنن تي 9 اهلڪار مقرر ڪيا ويا آهن. ميڊيا پاران پولنگ اسٽيشنن جا نتيجا پولنگ ختم ٿيڻ جي هڪ ڪلاڪ کانپوءِ جاري ڪري سگهجن ٿا، ووٽ اصل قومي سڃاڻپ ڪارڊ تي ئي ڪاسٽ ڪري سگهجي ٿو، جڏهن ته مدو ختم ٿيل سڃاڻپ ڪارڊن تي پڻ ووٽ ڪاسٽ ڪري سگهجي ٿو، اليڪشن ڪميشن پاران هلندڙ سال عام چونڊن لاءِ 26 ڪروڙ بيلٽ پيپرز شايع ڪيا ويا آهن. عام چونڊن جي نتيجن جي ترسيل لاءِ الڪيشن مينيجمينٽ سسٽم (ايم ايم ايس) استعمال ڪيو ويندو، پولنگ اسٽيشن تي امن امان جي صورتحال کي ڪنٽرول ڪرڻ لاءِ پرزائينڊنگ آفيسرن کي ميجسٽريٽ درجه اول جو درجو ڏنو ويو آهي، حساس ترين پولنگ اسٽيشنن تي پاڪ فوج مقرر آهي، مبصرن ۽ ميڊيا کي پولنگ اسٽيشنن ۾ داخل ٿيڻ جي اجازت آهي، سڄي ملڪ 144 ڊسٽرڪٽ رٽرننگ آفيسر ۽ 859 رٽرننگ ۽ اسسٽنٽ رٽرننگ آفيسر مقرر ڪيا ويا آهن. ڪل هڪ لک 91 هزار 526 پرزائينڊنگ آفيسر ۽ 7 لک 85 هزار 60 اسسٽنٽ پرزائينڊنگ آفيسر مقرر ڪيا ويا آهن. 5 هزار ڊيٽا انٽري آپريٽرز کي اي ايم ايس ذريعي نتيجن جي جوڙجڪ ۽فراهمي لاءِ رٽرننگ آفيسرن سان ڳنڍيو ويو آهي.
