اسلام آباد۔26اکتوبر(اے پی پی)وزیراعظم عمران خان دی اڳواݨی اچ اہم اجلاس تھئے۔ اجلاس اچ وزیراعلیٰ پنجاب سردار عثمان بزدار، وزیر داخلہ شیخ رشید احمد، وفاقی مذہبی امور نورالحق قادری اتے چیف سیکرٹری پنجاب سودھا ٻئے اعلیٰ حکام موجود ہن۔ اجلاس اچ ملکی سیاسی صورتحال، امن و امان دا جائزہ ڳھدا ڳیا۔ وفاقی وزیر مذہبی امور نورالحق قادری اجلاس کوں کالعدم تنظیم تحریک لبیک پاکستان دے احتجاج اتے ایں سانڳے ہݨ تئیں تھیوݨ آلے مذاکرات اچ پیش رفت دی تفصیل ݙسائی۔ وزیر داخلہ شیخ رشید احمد رستیاں کوں کلیئر کرݨ اتے احتجاج مکاوݨ کتیے اقدامات دا ݙسایا اتے مذاکراتی کمیٹی سانڳے تفصیل ݙسائی۔ اجلاس اچ ٹی ایل پی نال مذاکرات، سامݨے آوݨ آلے مطالبات اتے حکومتی حکمت عملی تے ڳالھ مہاڑ کیتی ڳئی۔ اجلاس اچ تاجراں دے احتجاج دا معاملہ وی زیر غور آیا۔ وزیراعظم آکھیا جو معاملات مذاکرات نال سلڄھاوݨ دی کوشش کیتی ونڄے، کہیں کوں وی قانون ہتھ اچ ڳھنݨ یا حالات خراب کرݨ دی اجازت نہ ݙتی ویسی۔
