کوئٹہ۔ 27 اگست (اے پی پی) وزیر اعلیٰ بلوچستان میر سرفراز بگٹی اتے وفاقی وزیرداخلہ محسن نقوی دی صدارت اچ بلوچستان اچ امن و امان متعلق خصوصی اجلاس وزیراعلٰی سیکرٹریٹ اچ تھیا ۔اجلاس اچ چیف سیکرٹری بلوچستان شکیل قادر خان ایڈیشنل چیف سیکرٹری داخلہ شہاب الدین انسپکٹرجنرل پولیس عبدالخالق شیخ ، ترجمان بلوچستان حکومت شاہد رند، ڈی آئی جی سی ٹی ڈی اعتزاز حسین گورایا ڈی آئی جی سپیشل برانچ ڈی جی لیویز اتے قانون نافذ کرݨ آلے اداریں دے اعلیٰ حکام شریک تھئن۔ اجلاس اچ صوبے اچ امن و امان دی صورتحال دا جائزہ ڳھدا ڳئے تے محکمہ داخلہ بلوچستان دی طرفوں شرکاء کوں صوبے دے مختلف علاقیں اچ دہشتگردی دے اڄوکے واقعات تے بریفنگ ݙتی ڳئی ۔اجلاس دے شرکاء بلوچستان اچ تکڑے امن دے قیام سانڳے وفاقی اتے صوبائی حکومتاں وچال موثر حکمت عملی تے اتفاق کریندے پولیس اتے لیویز دی پیشہ وارانہ استعداد کار اچ ودھارے ،بلوچستان پولیس کوں جدید آلات اتے سامان ݙیوݨ اتے پولیس افسراں دی کمی مکاوݨ سانڳے نویں اے ایس پیز کوں بطوراسپیشل کیس بلوچستان اچ تعینات کرݨ دا فیصلہ کیتے ۔اجلاس اچ طے پاتے جو بلوچستان اچ سیکورٹی دی صورتحال چنڳی بݨاوݨ سانڳے درکار فنڈز دی منظوری کیتے اپیکس کمیٹی توں منظوری ڳھدی ویسی جݙاں جو چمن اچ پاسپورٹ دے وختی تے اجراء سانڳے اسٹاف اتے سہولتاں ودھا ݙتیاں ویسن ۔ اجلاس اچ اے وی طے تھئے جو سوشل میڈیا تے ریاست مخالف سرگرمیاں اتے پروپیگنڈے دے تدارک سانڳے ایف آئی اے موثر کارروائی کریسی تے ایں سلسلے اچ ڈائریکٹر ایف آئی اے کوئٹہ اچ موجود رہ تے صورتحال دی مانیٹرنگ کریسن ۔اجلاس اچ ڳالھ کریندے وزیر اعلٰی بلوچستان میر سرفراز بگٹی اتے وفاقی وزیرداخلہ محسن نقوی آکھیے بلوچستان اچ امن سانڳے سارے دستیاب وسائل استعمال کریندے عوام دا جانی و مالی تحفظ ہر صورت یقینی بݨایا ویسی تے ریاست دی رٹ ہر صورت برقرار رکھی ویسی ، پاکستان دے خلاف ہر طرح دیاں سازشاں کوں ساجھے اتحاد و اتفاق نال ناکام بݨایا ویسی
